Ni 20/05/2025 chhun dar 12:00 khan, State Hub for Empowerment of Women (SHEW), Women & Child Development (WCD) buatsaihin, Lianchhiari Run, I & PR-ah HSLC leh HSSLC Exam Result chhuak hnuhnung bera Top 10-a tling hmeichhe naupangte hnenah lawmpuina pek a ni a.

 HSLC ah hian Top 10-a tling hi an vaiin mi 24 an ni a, hmeichhia Sawm (10) an awm a, HSSLC ah hian Arts ah Top 10-ah mi 16 langin 9 te chu hmeichhia an ni a, Science ah mi 15 langin hmeichhia 6 leh Commerce ah chuan Top 10-a lang mi sawm (10) zinga 5 chu hmeichhia an ni a, Top 10-a hmeichhe naupang lang hi HSLC leh HSSLC ah an vaiin Sawmthum (30) an awm a ni. Hmeichhe naupang, Zirna lam leh Sports lam thiam bikte chawimawina hun hi Beti Bachao Beti Padhao (BBBP) Scheme kaltlangin, kumtin neih thin a ni. BBBP Scheme in a tum ber chu Save the Girl Child, Educate the Girl Child tih a ni a, Mizo Tawng chuan Hmeichhe naupang chhanhim la, zirtirna tha pe rawh, tihna a ni.

He hun hi Pi Lalrinpuii, Hon’ble Minister, Social Welfare, Women & Child Development (SWWCD) Department chu Khuallian niin a hman pui a, Pi Zonunthari, Joint Secretary, SWWCD chu Chairman niin he hun hi a kaihruai a, kalkhawmte lawmna thu sawiin, Pi Zoramthangi Chhangte, Director WCD chuan Award chungchang sawi hawnna a nei bawk a ni. Pi Lalrinpuii, Hon’ble Minister, SWWCD chuan zirlaite fuihna thu sawiin, midangte tana kawng sialtu, beiseina siamtu leh nun tidanglam thei tura zirna thiltihtheihna tilangtu lo ni bawk turin a chah a ni. 

Chawimawina thilpek hian pawisa fai bakah Certificate a keng tel a ni. Kalkhawmte hi Crystal Malsawmi chuan zaiin a awi a, hemi hnu hian Pi Zonunpari Sailo, Joint Director, WCD chuan lawmthu sawina neiin hun hi a khar ta a ni.