INTEGRATED CHLID DEVELOPMENT SERVICES ( ICDS)

INTEGRATED CHILD DEVELOPMENT SERVICES

ICDS hi 2^nd Oct’1975 khan India ramah alo piang a.Enchhinnan India rama block hrang hrang 33 ah hman tan ani a.Mizoramah chuan kum  1978-79 khan a hmasa ber atan E.Lungdarah ICDS Project  chu kanlo nei ta ani.Tunah chuan India ram pumah pawh Anganwadi centre nuai 14 awm tawhin,Mizoram bikah pawh ICDS Project 27 awmin Anganwadi centre 2244 zet a awm tawh ani.

ICDS thiltumte (Objectives):

1.Naupang kum 6 hnuailam te chawtha eitir leh hriselna lama hma an lo sawn theihna ngaihtuah.

2. Rilru,taksa leh khawtlang nuna tha taka naupang than chhohna tura hmalak.

3.Naupang thi, pianhmang diklo,ei chhiat vanga tuar leh school kal chhunzawm theilote tihtlem.

4. Naupangte hamthatna tura sorkar Department hrang hrangten lungrual tak leh awmze nei taka an thawhho theih nana hmalak.

5.Naupangte hriselna lam leh chawtha pek belh kawnga an mamawhte an nute’n an hriata an enkawl thiam theihna tura nute zirtir.

ICDS HNATHAWHTE (Services): 

A chunga ICDS thiltumte tihhlawhtlinnan,heng a hnuaia hna te hi Anganwadi kaltlanga thawh ani :

1. CHAWTHA PEK (SUPPLEMENTARY NUTRITION) 
2. NON-FORMAL PRE-SCHOOL EDUCATION (EARLY CHILD HOOD CARE & EDUCATION) 
3. IMMUNISATION (HRI DANNA)
4. NUTRITION AND HEALTH EDUCATION ( Khawtlang mipuite hnena zirtirna pek): 
5.  KHAWTLANG MIPUITE TELVE NA (Community Participation) 

1.CHAWTHA PEK (SUPPLEMENTARY NUTRITION) :

Naupang kum 6 hnuailam Anganwadi a in ziaklut zawng zawng te leh Naupai zawng zawng leh Naupawm (nausen thla ruk hnuailam pawmte) leh tleirawl hmeichhia kum 11-14 inkar sikul kal tawhlo te hnenah chawtha hi pek ani.Chawtha an dawn dan tur hi felfai taka ngaihtuahsak anni a.Naupang zawng zawng te hi Anganwadi centre ah an rihna leh an sanzawng teh vek ani a,chumi a zir chuan chawtha an tlakchham leh tlakchhamloh dan a zirin chawtha hi pek anni.Kum 3 hnuailam te hnenah ‘Take Home Ration’ angin chawtha hi kar khatah vawi khat (Inrinni) ah pek thin anni a,kum 3-6 inkar te hnenah nitin Anganwadi ah ‘Hot Cooked Meal’ (Chaw chhum hmin) angin pek anni ve thung. A chhan chu heng naupangte hi zirtirna (Pre-School Education) dawng tura beisei anni. Nu naupai/Naupawm te leh tleirawlte pawh hian kar khat eitur chawtha hi Take-Home –Ration  ang tho a sem ani.

2. NON-FORMAL PRE-SCHOOL EDUCATION (EARLY CHILD HOOD CARE & EDUCATION):

Naupang kum3-6 inkar te hi nitin darker 4 zirtirna dawng tur anni a.Zing dar 9.00 am atanga chhun dar 1.00 pm thlengin zirtirna pek anni.Kum 2013 atang khan National ECCE Policy zulzuiin heng naupangte zirtur hian Curriculum duan ani a.Naupangte’n nuam ti tak leh zalen tak chunga zirtirna an dawn theihnan an kumin a phak tawk ang zela tihtur (Activity) hmanga zirtirna hi pek anni.Naupang kum leh mizia pawhin a phakloh thil ziah vak vak te leh Home-Work in pekte hian naupangte rilru a ti sawngnawi thei a.Chu chu hriaiin Infiam paha zirna (Play based) leh Tihtur (Activity based) a zirna hi pek vek anni.Thawhtanni atanga zirtawpni thlengin Pre-School hi neihpui thin anni a,Thupui hrang hrang (Themes) 21 kalpui niin naupangteah hmasawnna tinreng (All Round Development) a thlen theih nan zirna hi kalpui ani.

3. IMMUNISATION (HRI DANNA): 

            Health Department te nen tangrualin naupang leh nu te hnenah hri danna pek thin ani a.Anganwadi Worker te hian an bial chhunga nu leh naupang hri danna lak dan tur leh lak hunte anlo chhinchhiah vek a, hri danna pek niah Health Worker te nen thawk dunin a mamawh zawng zawng te hnenah an pe thin ani.Tin,Health Department hmalakna dang : Pulse Polio Immunisation te,National De-worming Day te leh Intensified Diarrhoea Control Fortnight angah te hian Anganwadi ah heng hri danna leh damdawi te hi pek thin anni.

4. NUTRITION AND HEALTH EDUCATION ( Khawtlang mipuite hnena zirtirna pek): 

Mipuite hnena a thlawna thil sem hi thil tha tak ni mahse,mipuite khan anmahni invendan leh inenkawl an thiam kha a pawimawh hle a,chu chu hria in khawtlang mipuite hnena zirtirna pek hi ICDS chuan a dah chung nung hle ani.Anganwadi ah te leh Community Hallah te mipui ko khawmin thupui hrang hrang hmangin zirtirna pek thin ani.Tunah phei chuan Poshan Abhiyaan hnuaiah ‘Community Based Events’ te neiin thupui duansa nena zirtirna pek thin anni.Heng thupui te hi chi hrang hrang a awm:

• Hnute tui pek dan dik
• Naute thla 6 an tlin atanga chaw pek dan dik
• Nuin nau a pai laia a inenkawl dan tur
• Nau neih dawna inpuahchah dan
• Chaw tha awmzia (Balanced Diet) leh a siam dan
• Naupiang sawngnawi/buk zang lutuk in lama enkawl dan
• Inchhunga pa te pawimawhna inzirtir etc etc

5. KHAWTLANG MIPUITE TELVE NA (Community Participation):

            Khawtlang mipuite tellovin ICDS hi a kal theilo ani tih hriaiin an telve na tur leh tangkai zawka mipuite an awm theih nan Committee hrang hrang duan ani a. Chungte chu:

Anganwadi Co-Ordination Committee: He committee ah hian khawtlang hruaitute leh nu leh pa te telin Anganwadi hmasawnna tur tamtak an ngaihtuah ho thin.Entirnan- Tui thianghlim chungchang te,Anganwadi in sak te leh repair te,Project office atanga chawtha phurh dan tur te,Anganwadi Worker leh Helper hna lak te etc.

Tin,hetiang zelin he committee hi Khaw huap te (Village Level), Block huap (Block Level) te,District Level te leh State Level te thlengin a inzar pharh ani.

ICDS CHHAWR TUTE (BENEFICIARIES): 

2020-21 chhunga ICDS chhawrtute chu a hnuaia tarlan ang hi anni :

• Naupang thla 6 - kum 3 inkar     = 62674
• Naupang Kum 3 – Kum 6 inkar  = 63135
• Nu naupai & Naupawm                = 29296
• Hmeichhe tleirawl                          = 1300

Anganwadi hi Mizoram khaw tin deuhthawah a awm tawh a,Anganwadi centre zawng zawng hian mahni bial chin an nei vek a,Anganwadi centre 25 zel hi Circle pakhat angah a ngaih theih a,nimahsela,hmun thenkhat ah chuan 25 aia tam emaw tlem emaw pawh Circle pakhatin a huam thei ani.Chutiang circle engemaw zat chuan ICDS Project pakhat a siam leh a.ICDS Project hi Rural Development Block ang zela then ani a,Mizoramah erawh chuan Aizawl khawpui bik hi Urban Block niin a zavaiin ICDS Project   27 kan nei ani.Project enkawltu chu CDPO ani a,Circle enkawltu chu Circle Officer ani. Tin,District pariat (8) angin ICDS hi ala function a,District hotu ah hian District Programme Officer an awm ani. Sorkar laipui – Ministry of Women & Child Development enkawlna hnuaia  awmin, he scheme enkawlna atan hian funding pattern pawh 90:10 ani.

Anganwadi zawng zawng te hian ‘Unique Identification Code’ an neih vek bakah,ICDS Project zawng zawng leh District zawng zawng pawh hian ‘Code’ an nei vek a, chutiang zelin State Code thlengin a awm ani.ICDS hian a piantirh atangin Guidelines fel tak a nei thlap a,Heng guidelines leh instructions te hi Ministry hian a rawn thlak/Update zeuh zeuh thin ani.

            Mizorama ICDS inzarpharh dan chu hetiang hi ani :

EARLY CHILDHOOD CARE & EDUCATION :

Naupangte hnena an phak ang tawka zirtirna pek hi ICDS thiltum te zinga pawimawh tak pakhat anih avangin Anganwadi worker te pawhin naupangte hnenah zirtirna anlo p eve tawh thin a.Non- Formal Pre-School Education tih hming puin Anganwadi ah hian kalpui alo ni tawh thin a.Kum 2013 atang khan hei aia awmze nei leh rualkhai zawka kaldantur hi Ministry lamin an rawn duang ta a.Tin, National Early Childhood Care & Education Policy te India ramin kan lo neih tak ah chuan he policy zulzui hian Curriculum te kanlo nei ta a.Child Psychologists te leh educationists tamtak ngaih danah chuan naupang kum 6 hnuailam te hian ‘Formal ‘ taka lehkha zir hi an thluakin ala tlin lova.Naupanga mize bet tlat – inkhualtelem te,infiam te,zai leh lam te leh thiltih (Activity) hmanga zirtirna inpek hi naupangin an thiam hmain an rilru ah a bet nghet zawk ani tiin hetiang zulzui hian naupangte chu zirtirna pek tur ani an ti a.Tin,Mizoram mai nilo,India ram puma Anganwadia zirna hi a inang anga,curriculum chi khat hman tur ani antih takah chuan Mizorama hman turin Curriculum chu duan alo nita a.Tin,mithiamte chuan naupang kum 6 hnuailam zirtirna hi anmahni tawng (mother tongue) in ani tur ani tih anih avangin Mizo tawngin he Curriculum hi duan vek ani a.Naupangin an hrethiamin nuam anti em em a,Homework leh thilziah vak vak te leh by-heart vak vak ang chi te hi phalloh anih avangin Anganwadia kal hi naupangte chuan nuam anti hle ani.Curriculum hman anih hnu hian kan Anganwadi hmel te pawh alo danglam ta a.Naupangte mit ti tlai tu turin bang leh ceiling te thlengin chei alo nit a a.Nasa takin ‘Teaching Aids’ te hman anih tak ah chuan Anganwadi worker te pawh an buai phah hle ani. Tin,thupui inang vek neiin ram pumah zirtirna pek anni avangin ICDS a thawktu te tan pawh endik/monitor a awlsam phah a,naupangin an hlawkpui hle bawk ani.Khawtlang huapin ‘ECCE Day’ te hman ani thin a,nu leh pa te hnenah ECCE awmzia te sawi thin ani.

ECCE thlalak thenkhat te